Gurit 1

TETESING LUDIRA

ING TLATAH AMBARAWA

(dening R.M. Restu Budi Setiawan)

Sepian maneh katon satriya kang luhur nyikep bantala

Pasuryan sepi, ngampet laraning raga

Pemuda ngampuruk tampa daya ing bumiku Ambarawa

Sikile tengen ketaman wiji laras dowo

Naging isih ana pangajab kanggo sambat sebut

Ya sambat marang bapaku angkasa ibuku pertiwi

Lan kober amemuji sesanti mrih jaya lan waluyaning negeri

Duh gusti paringa nugraha mring awak mami

Mangkono penyuwune

Bareng suruping sang Hyang Arko

Bareng kedeping netra lan lakuning bajra herawana

Tan kendhat ludira mili yayah dineres

Mijile sang Hyang Candra, nyunari bumiku pertiwi

Kuthaku sepi, marga tan ana sing njamah

Nyenyet tanpa swara kaya – kaya angin wae ora obah

Kuthaku rusak sak, bobrok katon roto lan lemah

Nanging ing saselaning remukan bale iku

Ana setitik penguripan dikanti ilining ludira

Apa isih ana pangajab sapa kang bisa tetulung

Saiki wayah gagat rahina, swara lekas keprungu

Lamat – lamat apa kang bisa dirungu dening pemuda iku

Jroning driya pemuda iku ngrasa

Nyata aku iki wis arep layu,

Muga gusti paring pangapura mring aku

Lan muga ana kang ngreksa kuandaku

Kapacak ing panjebar semangat no 38 taon 2009