Gurit 2

Mranggas

(dening R.M. Restu Budi Setiawan)

dak sawang ing ngarepku alas jati kang gumelar

hawa adem ing wektu rendheng agawe reseping ati

gegodhongan kang rungkut agawe rasa tintrim

sumilire angina sore iki pranyata nggawa nawala

nawala kang ngemot pralampita ngreridhu ati

kurang sesasi meneh tumeka mangsa ketiga

aku ora bisa nyawang sesawangan kang endhah ing alas pejaten iki

jalaran gegodhongan padha mranggas ilang tanpa tilas

kang katon amung padhang gumelar

lan hawa panas gawe sumpeging ati

kang kasurat mau lir gegambaraning ati kang sedhih

ati kang bakal remuk jalaran ilanging nimas tresnaku

kang bakal krama priya liya

krama bareng wanci mranggase godhong jati

dhuh Gusti, apa ta salahe awaku iki?

Nyawang sesawangan kang endah amung kari sesasi

Sabubare aku amung kari nyawang sesawangan kang mblerengi

Mranggase godhong jati bareng karo mranggase atiku

Gusti, mugi-mugi mranggase atiku tan beda mranggase jati

Kang pranyata isih bisa trubus mbesuk ing mangsa rendheng

Kapacak ing PS nomer 5, 30 januari 2010